Referendum kundër ashpërsimit të Ligjit mbi Azilin

Sipas komitetit për referendum deri më tash janë grumbulluar 63224 nënshkrime të vlefshme

Ashpërsimi i ri i ligjit mbi azilin, për të cilin parlamenti ka dhenë pëlqimin, ka ngjallur pakënaqësi të madhe në mesin e të majtës. Për këtë arsye, qarqe të majta dhe organizata për mbrojtjen e refugjatëve zvicerane kanë filluar grumbullimin e nënshkrimeve për të mbajtur një referendum kundër ashpërsimit.

Sipas komitetit për referendum deri më tash janë grumbulluar 63224 nënshkrime të vlefshme. Kjo, sipas Andreas Lustenberger, bashkëkryetar i të gjelbërve të rinj tregon se një pjesë e madhe e popullatës në Zvicër është e gatshme të angazhohet për një politikë më humane të azilit.

Në fokus të kritikave të revizionit të ligjit mbi azilin është sidomos neni që ndalon kërkimin e azilit në përfaqësitë diplomatike dhe ai për mosnjohjen si bazë për azil të dezertimit nga ushtria.

Pasi që ndryshimet në ligjin e azilit qenë shpallur nga parlamenti si urgjente, ato kanë hyrë në fuqi menjëherë dhe vlejnë në mënyrë të kushtëzuar deri në shtator 2015, nëse dy dhomat e parlamentit i fusin ato ne legjislacionin e rregullt. Por, nëse populli në referendum e refuzon, atëherë ndryshimet urgjente vlejnë vetëm deri në fund të shtatorit 2013.