28631 azilkërkues gjatë vitit 2012

Lista udhëhiqet nga Eritrea me 4400 persona, dhe pasohet nga Nigeria, Tunizia, Serbia, Afganistani dhe Siria

Ajo që supozohej gjatë tërë vitit që lamë pas, u dëshmua edhe nga statistika: numri i kërkesave të azilit gjatë vitit 2012 ka shënuar një rritje të madhe krahasuar me vitin paraprak. Plot 27 për qind më shumë kërkesa azili, ose gjithsej 28.631 veta janë regjistruar në vitin që kaloi, ka bërë të ditur të martën Zyra Federale për Migracion.

Ky është numri më i madh që nga “kriza kosovare” e vitit 1999, kur Zvicra kishte strehuar rreth 47.000 refugjatë nga Kosova.

Gjatë vitit 2012 të drejtën e azilit e kanë fituar 2507 veta, që është dukshëm më pak se në vitin 2011 kur këtë të drejtë e kishin fituar 3711 veta.

Po ashtu gjatë vitit 2012 ka pasur një rënie të numrit të personave që kanë marrë statusin e përkohshëm (F).

Lista e vendeve prej nga vijnë më shumë azilkërkues vazhdon të udhëhiqet nga Eritrea me 4400 persona, dhe pasohet nga Nigeria, Tunizia, Serbia, Afganistani dhe Siria.

Zyra Federale për Migracion (BFM) konstaton se numri i azilkërkuesve do të ishte më i madh sikur në gusht të mos ishte vendosur afati i shkurtuar 48 orësh i shqyrtimit të kërkesave të azilkërkuesve nga vendet e Ballkanit.