Sommaruga përmirëson Maurerin për holokaustin

Fjalimi i Sommaruga-s vjen katër ditë pas mesazhit të kontestuar zyrtar të Zvicrës në ditën e kujtimit të holokaustit që e kishte bërë presidenti, Ueli Maurer

Në një simpozium të mbajtur në Bernë, që kishte për temë azilin, ministrja e drejtësisë, Simonetta Sommaruga është marrë sërish me temën e raportit të shtetit zviceran me holokaustin.

Duke folur për sjelljen që kanë treguar qeveritarët e Zvicrës gjatë Luftës së Dytë Botërore kundrejt viktimave të nazizmit gjerman, Sommaruga ka thënë se dështimi i tyre ka qenë i pafalshëm. Kjo, me gjithë faktin se Qeveria Federale gjatë viteve të nëntëdhjeta kishte bërë kërkim faljeje në mënyrë zyrtare.

Fjalimi i Sommaruga-s vjen katër ditë pas mesazhit zyrtar të Zvicrës në ditën e kujtimit të holokaustit që e kishte bërë presidenti, Ueli Maurer. Organizatat hebrenje të Zvicrës i kishin drejtuar kritika Maurerit për faktin se, sipas tyre, ai në mesazhin e tij nuk i kishte kushtuar vëmendjen e duhur fatit tragjik të refugjatëve hebrenj që ishin dërguar në vdekje të sigurt nga shkaku i qëndrimit refuzues të qeverisë së atëhershme zvicerane ndaj tyre.