Dy kosovarë, pjesë e “plaçkitjes”: 9 vjet burg

Dy ndihmësit e “plaçkitësve”, të cilët kishin për detyrë të ndihmonin ikjen e të parëve, ishin kosovarë. Ata janë dënuar me 6 vjet gjegjësisht 2 vjet e 9 muaj burg

Pasi që një bizhuteri në Bazel ishte plaçkitur 5 herë brenda 3 vitesh, ajo ishte vënë nën llupë të organeve ndjekëse me dyshimin për simulimin e këtyre sulmeve për të përfituar nga sigurimet. Këtë dyshim e forconte edhe më shumë  fakti se i biri i pronarit të bizhuterisë punonte pikërisht në formën e sigurimeve ku lokali i këtij të fundit ishte i siguruar.

Në vendimin gjyqësor kundër dy personave që kanë aktruar plaçkitjen, gjykata bën fjalë për një mashtrim të sigurimeve në marrëveshje me pronarin e bizhuterisë. Kështu, të dy personat e përmendur nuk janë akuzuar për plaçkitje të armatosur por për mashtrim, vënie në lajthitje të drejtësisë dhe për fajësim të rrejshëm.

Se nuk bëhet fjalë për një sulm të vërtetë për plaçkitje, gjykata ka konstatuar duke u mbështetur në deklaratat e dy pjesëmarrësve në “sulm”. Sigurisht edhe vendi i punës i të birit të pronarit  në kompaninë e sigurimeve ka qenë një dëshmi plus.

Në shitore janë vjedhur stoli ari dhe të tjera në vlerë të 100 mijë frangash.

Dy ndihmësit e “plaçkitësve”, të cilët në plaçkitjen e fundit, të inskenuar të vitit 2011kishin për detyrë të ndihmonin ikjen e të parëve, ishin kosovarë. Ata janë dënuar në maj të vitit 2012, në Gjykatën Penale të qytetit Bazel njëri në një procedurë të veçantë. Njëri, 23 vjeçar është dënuar me 6 vjet burg ndërsa 48 vjeçi M.G., familjar i tij, ka marrë dënimin prej 2 vjet e nëntë muaj burg, ndonëse sipas trupit gjykues ky ka “mbajtur penjtë” gjatë aktit të plaçkitjes. M.G., sipas vendimit gjyqësor ka bërë marrëveshjen me pronarin e bizhuterisë dhe bart një pjesë të përgjegjësisë edhe për kurdisjen e kompensimit të dëmit nga kompania e sigurimeve.

Ndërkaq, mbetet e paqarte nëse bashkëkryesit kanë marrë pjesë në ndarjen e shumës prej 100 mijë frangash që ka paguar kompania e sigurimeve. 

Ende nuk është kryer gjykimi i pronarit të bizhuterisë dhe të birit të tij, të cilët dyshohen për organizimin e simulimit të plaçkitjeve.