Nuk ndalohen celularët për azilkërkuesit kriminelë

Qeveria: "Ai që dëshiron të kryejë një delikt, vështirë se do të heq dorë nga kjo vetëm nga fakti se nuk posedon telefon mobil"

Grupi parlamentar i SVP-UDC-së në Parlamentin e Kantonit të St. Gallenit ka kërkuar që t`u ndalohet posedimi i telefonave mobilë, laptopëve, tabletëve dhe aparateve të ngjashme azilkërkuesve të kriminalizuar.

“Autoritetet e dinë fare mirë se përmes mjeteve të tilla të komunikimit, personat në fjalë kanë mundësi që pa u vënë re të komunikojnë për kryerjen e veprave kriminale. Për këtë arsye një ndalim i tyre do të ishte hap në drejtim të duhur”, ka shkruar SVP në mocionin e saj. 

Por, ndryshe mendon qeveria e kantonit. Sipas saj, “ndalimi i aparateve të komunikimit mobil nuk është masë efikase për të vepruar kundër azilkërkuesve kriminelë”.

Ndonëse telefonët mobilë përdoren shpesh në rastet e delikteve, sipas qeverisë, nuk ka mundur të konstatohet ndonjë lidhje në mes të pasjes së një telefoni të tillë dhe numrit të delikteve që kryhen. Ai që dëshiron të kryejë një delikt, vështirë se do të heq dorë nga kjo vetëm nga fakti se nuk posedon telefon mobil.

Prandaj, shprehet e prerë qeveria “nuk mund të presim ndonjë efekt frikësues nga ndalesa e mjeteve të komunikimit, si telefonët mobilë etj”.

Veç kësaj, sipas qeverisë, një ndalesë e tillë do të ishte e pazbatueshme edhe nga ana praktike.