Nuk ka të drejtë vote për të huajt

Sipas iniciativës, e cila është kundërshtuar nga shumica, komunat do të vendosnin vetë nëse do t`ua lejojnë shtetasve të huaj të drejtën e votës.

Të huajt në kantonin e Cyrihut edhe në të ardhmen do ta kenë të ndaluar të marrin pjesë në votime. Parlamenti i Kantonit ka vendosur të hënën me shumicë votash (93:68) kundër dhënies së të drejtës së votës fakultative për të huajt.

Për të drejtën e votimit në nivel komunal kanë qenë vetëm deputetët e Partisë Socialdemokrate, të gjelbër dhe asaj të iberale të gjelbër. Të gjithë deputetët e partive tjera kanë qenë kundër. Sipas tyre pra, të drejtat politike në Kantonin e Cyrihut janë të lidhura me të drejtën e shtetësisë së Zvicrës.

Qëllimi i iniciativës së lancuar nga shoqata Second@s Plus dhe të pranuar nga institucionet përkatëse në gushtin e vitit 2011, ka qenë që të huajt me qëndrim të gjatë në kantonin e Cyrihut të fitojnë të drejtat politike në nivel komunal. Sipas iniciativës, komunat vendosin pastaj vetë nëse do t`ua lejojnë shtetasve të huaj të drejtën e votës.  

Këtë të drejtë do ta fitonin të huajt që kanë jetuar të paktën 10 vjet në Zvicër ndërsa tri vitet e fundit në komunën e caktuar.