Sensacion: Shërohet foshnja e infektuar me HIV/AIDS

“Qasja e re u ka hapur dyert mjekëve në trajtimin dhe kurimin e AIDS-it, veçanërisht në rajone të tilla si Afrika, ku shumë fëmijë janë të lindur me HIV nga nënat e infektuara"

Mjekët amerikanë kanë arritur për herë të parë të kurojnë një foshnje mbartëse të virusit HIV/AIDS pasi ishte lindur nga një nënë e infektuar me këtë virus. Ata kishin trajtuar fëmijën menjëherë pas lindjes.

Edhe pse te fëmija në fjalë nuk ishte zhdukur në tërësi virusi HIV, virologët amerikanë thanë të dielën në një kongres specialistësh në Atlanta të SHBA-ve se prania e virusit tani ishte aq e ulët dhe se sistemi imunitar i fëmijës mund ta kontrollojë në të ardhmen pa mjekim të mëtejshëm.

Nëna e infektuar kishte transmetuar virusin te fëmija e saj në lindje. Më pak se 30 orë pas lindjes, mjekët e kishin trajtuar foshnjën me terapi antiretrovirale.

“Qasja e re u ka hapur dyert mjekëve në trajtimin dhe kurimin e AIDS-it, veçanërisht në rajone të tilla si Afrika, ku shumë fëmijë janë të lindur me HIV nga nënat e infektuara, specialistët” , thanë mjekët të dielën në Atlanta.

Në mbarë botën në vitin 2011 kanë lindur 300 mijë foshnje me HIV, kryesisht në vendet e varfra, ku vetëm 60 për qind e grave shtatzëna të infektuara merrnin trajtim që të parandalohet kalimi i virusit te fëmijët e tyre.

Aktualisht në botë vdesin çdo vit rreth 1.7 milion njerëz me AIDS. Numri i i infektuarve me HIV/AIDS ka shënuar rënie për 19 për qind brenda një dekade. Numri i vdekjeve nga AIDS ka shënuar rënie që nga viti 2005 për 26 për qind.