Punëtorëve të teleferikut, u lejohet ndërrimi 15 orësh

Ndryshimi që e ka miratuar qeveria është bërë me pajtim të plotë dhe njëzëshëm nga komisioni i paritetit i partnerëve socialë

Të punësuarit në teleferiqe nga muaji maj do të kenë të drejtë që në pikun e sezonit të punojnë deri në 15 orë në një ndërrim. Ndërsa pa pauzë me të renë do të lejohet puna për pesë orë e gjysmë, në rast se personeli pranon, në vend të gjashtë orë, sa ka qenë deri më tash.

Këtë ndryshim të ligjit të punës e ka miratuar Këshilli Federal të premten dhe e ka vënë menjëherë në fuqi.

Siç bën të ditur qeveria, ndryshimi është bërë me pajtim të plotë dhe njëzëshëm nga komisioni i paritetit të partnerëve socialë për oraret e punës. Ndryshimet, sipas tyre marrin parasysh si interesin e vetë të punësuarve  ashtu edhe mbrojtjen e shëndetit dhe te sigurisë së tyre.

Në punën në teleferik, në baza sezonale paraqiten ndryshime të mëdha sa i përket ngarkesës me punë. Ndërsa kushtet atmosferike mund t`i rrisin edhe më shumë këto ndryshime. Për këtë arsye punëdhënësit kane kërkuar një zbutje të rregullave për orarin e punës.