Shkon në tre numri i të vdekurve nga shpërthimi në Boston

Po ashtu edhe numri i të lënduarve është shtuar në 176. 17 prej tyre janë në gjendje kritike

Sipas informatave më të reja që plasojnë agjencitë e lajmeve, në shpërthimet që kanë ndodhur të hënën, më 15 prill në Boston të SHBA-së ka vdekur edhe personi i tretë. Bëhet fjalë për një fëmijë tetëvjeçar.

Po ashtu edhe numri i të lënduarve është shtuar në 176. 17 prej tyre janë në gjendje kritike, njoftojnë agjencitë e lajmeve nga vendi i shpërthimit.

Autoritetet janë ende në kërkim të personave ose organizatave të cilat kanë vendosur bombat. Deri më tash nuk ka njoftime për identitetin e tyre.

Shpërthimet e djeshme në Boston vlerësohen si më të fuqishmet që kanë ndodhur në SHBA që nga ai i 11 shtatorit 2001.

————–

Kanë gjetur vdekjen dy persona dhe së paku 40 janë plagosur nga dy shpërthime që kanë goditur vijën e finishit në Maratonën e Bostonit, pasditen e të hënës.

Shpërthimet kanë shkatërruar atmosferën e njërës prej ngjarjeve më të mëdha sportive në Shtetet e Bashkuara, duke shkaktuar panik dhe konfuzion.

Shërbimet e emergjencës janë shfaqur në vendin e ngjarjes, i cili shpejt është rrethuar nga forca të shumta të policisë.

Shpërthimet kanë qenë të njëpasnjëshme dhe kanë ndodhur rreth dy orë pasi fituesit kanë arritur në cak, përkatësisht rreth orës 14:50, sipas kohës lokale.

Njësitet emergjente po shfrytëzojnë tendën e ngritur për vrapuesit e maratonës, për të trajtuar të plagosurit, njofton ReL.

Një zyrtar i Shtëpisë së Bardhë ka thënë se presidenti Barack Obama është njoftuar për ngjarjen dhe se ka urdhëruar administratën e tij që të ofrojë ndihmë në hetime. Nënpresidenti Joe Biden ka thënë se “lutjet tona janë me njerëzit në Boston, të cilët kanë pësuar lëndime”.

Administrata Federale e Aviacionit ka krijuar zonë të ndalim-fluturimit mbi vendin e ngjarjes. Ndërkaq, në Uashington dhe Nju Jork është rritur dukshëm siguria përreth vendeve kyçe.

Maratona e Bostonit është njëra nga gjashtë maratonat më të mëdha në botë. Rreth gjysma e 27,000 atletëve të regjistruar kanë pasur të përfunduar garën në kohën e shpërthimit.