Hyjnë në fuqi kuotat për emigrantët e BE-së

Në Zvicër kanë hyrë në fuqi kuotat e caktuara nga qeveria për qytetarët e Bashkimit Evropian që mund të vijnë për të punuar për një vit

Emigrantet: Foto: Ilustrim

Kuotat për zvogëlimin e numrit të qytetarëve evropianë që duan të punojnë në Zvicër hyjnë në fuqi më 1 qershor.

Zvicra, që nuk është vend anëtar i BE-së, deklaron se emigracioni ka arritur nivele të papranueshme, me të huajt që përbëjnë çerekun e popullsisë. 

Autoritetet zvicerane kanë arritur një sërë marrëveshjesh me BE-në për lëvizjen e lirë të qytetarëve, në këmbim të aksesit në tregjet evropiane. 

Komisioni Evropian ka paralajmëruar se hyrja në fuqi e kuotave mund të vërë në rrezik marrëdhëniet. Shumica e emigrantëve në Zvicër vijnë nga vende si Gjermania, Spanja, Portugalia dhe Italia. 

Korrespondentët e mediave ndërkombëtare deklarojnë se emigrantët portugezë që kërkojnë punë do të preken më shumë nga skema e re. 

BBC nga Gjeneva thotë se Zvicra nuk duhet të ankohet shumë. Ajo ka një kuotë papunësie më pak se 3 për qind, një rritje ekonomike më të lartë se parashikimet dhe një monedhë të fuqishme në tregun valutor. 

Një deklaratë e fundit e qeverisë thotë se numri i personave në ardhje në vend ka tejkaluar numrin e atyre që largohen me 80 mijë në vitet e fundit.

Qeveria zvicerane është nën presion politik nga të dyja krahët, e majta dhe e djathta, që deklarojnë se emigracioni ka arritur nivele të papranueshme. 

Numri i shtetasve të huaj në Zvicër ka arritur në 25 % të popullsisë, pa llogaritur ata emigrantë që kanë marrë shtetësi zvicerane. Pjesa më e madhe e tyre vijnë nga vendet e BE-së, ku papunësia ka arritur nivele të larta.

Sipas një raporti, popullsia zvicerane pranon tregjet e tyre që kanë nevojë për më shumë punëtorë, por ata ankohen për çmimet e larta të shtëpive dhe mbipopullimin e shkollave, pasoja këto të shkaktuara nga fluksi i emigrantëve.

Duke filluar që nga 1 qershori, emigrantët nga Estonia, Hungaria, Lituania, Letonia, Polonia, Sllovakia, Sllovenia dhe Republika Çeke, do të kenë një kuotë pranimi prej 2,180 rezidentësh.

Për të njëjtën periudhë kohe, pra për vitin e ardhshëm, kuotat për 17 vendet e vjetra anëtare të BE-së, do të fiksohet në 53.700. Emigrimi në Zvicër, i punëkërkuesve nga Bullgaria dhe Rumania është pezulluar.