Protestat me maska nuk ndalohen në nivel nacional

Aktualisht në disa kantone janë në fuqi ndalesat për mbulim ose maskim por është shumë e vështirë që ato të zbatohen

Në Zvicër edhe në të ardhmen, në nivel nacional, nuk do të jetë e ndaluar që persona me fytyrë të mbuluar të marrin pjesë në tubime publike me fytyrë të mbuluar. Kështu ka vendosur sot me shumicë votash (110 me 64) Dhoma Nacionale e Parlamentit të Zvicrës, duke hedhur poshtë një mocion të bërë nga SVP/UDC.

Çështja e sigurisë është kompetencë e kantoneve dhe e qyteteve, kështu që pushteti qendror nuk dëshiron që të ngatërrohet në të. Ky është qëndrimi i shumicës së deputetëve që votuan të enjten. Një qëndrim të tillë e mbrojtën, me shumicë dërmuese votash (27:3) edhe deputetët e Dhomës së Kantoneve. Megjithatë aktualisht në disa kantone janë në fuqi ndalesat për mbulim ose maskim por është shumë e vështirë që ato të zbatohen.

Problemi i personave të maskuar që marrin pjesë në manifestime publike është aktualizuar sidomos javën që kaloi, kur në një manifestim në Bernë, të thirrur në Facebook, morën pjesë mijëra veta. Një pjesë më agresive e manifestuesve, me fytyra të mbuluara me maska shkaktuan dhunë me ç`rast pati ndërhyrje të policisë dhe përleshje midis dy palëve.