Punëtorët shëndetësorë në Kosovë, në grevë 24-orëshe

Punëtorët shëndetësorë të Qendrës Klinike Universitare të Kosovës, në orën 7 të mëngjesit kanë filluar grevën 24-orëshe. Vetëm Klinika Emergjente ka ofruar shërbime mjekësore të hënën në Qendrën Klinike Universitare të Kosovës.

Ata po kërkojnë ngritjen e pagave për mjekët dhe punëtorët teknikë të këtij sektori. Përveç kësaj, punëtorët shëndetësorë po kërkojnë edhe respektimin e kontratës kolektive sektoriale.

Në rast të mospërmbushjes së kërkesave, punëtorët shëndetësorë paralajmërojnë se mund të ketë masa edhe më radikale sindikaliste.

Nga Zyra e drejtorit të përgjithshëm në SHSKUK kanë thënë se janë njoftuar me kohë nga ana e Federatës Sindikale të Shëndetësisë lidhur me grevën.

E Ministria e Shëndetësisë  thotë se qëndron prapa këtyre kërkesave dhe argumenteve të prezantuara në Qeveri dhe në Projektligjin për pagat dhe beson që përgjigja për to do të jetë pozitive nga ana e Qeverisë dhe Kuvendit, me qëllim që sistemit shëndetësor t’i jepet shtytje në reformën e tij.