Gjeneva, e gatshme për qendrën e azilkërkuesve problematikë

Drejtori i policive kantonale, Hans-Jürg Käser: Eshtë urgjentisht e nevojshme që t`i ndajmë azilkërkuesit problematikë prej të tjerëve

Pas votimit bindës të qytetarëve zviceranë në favor të rishikimit (ashpërsimit) të Ligjit mbi Azilin, tash bëhet e mundur strehimi i azilkërkuesve të dhunshëm në qendra speciale të strehimit. Kjo mundësi e hapur është shenjë pozitive për kryetarin e drejtorëve konferencës së drejtorëve policive kantonale, Hans-Jürg Käser .

“Jam shumë i kënaqur. Mendoj se kjo është një zgjidhje shumë e mirë që ofrohet në fushë të azilit. Është urgjentisht e nevojshme që t`i ndajmë azilkërkuesit problematikë prej të tjerëve. Kjo për faktin se ata ngarkojnë të tjerët dhe vështirësojnë bashkëjetesën”, ka thënë Käser për radion SRF.

Ndërkaq gjetja e vendeve për hapjen e qendrave të tilla speciale po tregohet e vështirë. Në këtë kuptim Käser e përshëndet gatishmërinë e kantonit të Gjenevës për të ofruar hapësirë për një qendër të tillë. Por Käser parapëlqen që qendrat e tilla të hapen në vende të izoluara në mënyrë që popullata të mos vijë në kontakt me azilkërkuesit problematikë.