Zvicrën mund ta braktisin koncernet e mëdha

Shqetësimet në shoqërinë zvicerane për dallimet e mëdha në paga,mund t`i shtyjnë koncernet e mëdha që selitë e tyre t`i bartin në botën e jashtme

Sipas institucionit liberal të studimeve (Think Tank) “Avenir Suisse”, Zvicra nxjerr fitime të mëdha nga koncernet e mëdha që kanë selinë këtu. Në dritën e pakënaqësive në shoqëri, edhe koncernet e tilla multinacionale duhet të marrin përgjegjësi. Prandaj u takon udhëheqësve të këtyre koncerneve që të zvogëlojnë sërish hendekun në mes të ndërmarrjeve dhe shoqërisë, shkruan  “Avenir Suisse” në një letër të publikuar të hënën ku ajo prezanton qëndrimet e veta.

Si shkas për këtë shkresë  ka shërbyer debati shoqëror në lidhje me globalizimin dhe pasojat e tij për shoqërinë, me ç`rast një masë e pakënaqësisë drejtohet edhe kundër  koncerneve të mëdha. Ky shqetësim sipas Avenir mund t`i shtyjë koncernet në fjalë që selitë e tyre t`i bartin në botën e jashtme dhe kjo do të përbente rrezik për Zvicrën si qendër me rëndësi financiare në botë.

Këtë rrezik qarqet liberale e aktualizojnë duke iu referuar iniciativës së Juso-s për reduktimin e dallimeve në paga 1:12. Për skenarë  të ngjashëm të shpërnguljes së firmave të mëdha nga Zvicra është folur edhe me rastin e iniciativës kundër zhvatësve (e cila pak muaj më parë pati fituar bindshëm). Atëherë spekulohej se i pasojë do të kishte edhe shkurtime të vendeve të punës, shkruan nzz.ch.

Ndonëse nuk mund të matet me saktësi kontributi i koncerneve të mëdha për ekonominë e Zvicrës, megjithatë Zvicra nuk guxon të cilësohet si vend që ka vetëm ndërmarrje të vogla dhe të mesme. Ndërsa dihet se inovacioni në masën më të madhe bartet nga ndërmarrjet e mëdha multinacionale. Këto ndërmarrje po arrijnë që të mbijetojnë në konkurrencë ndërkombëtare, gjë kjo që ka rëndësi për stabilitetin e Zvicrës.