Delegacioni i Kosovës për dialogun, takon Mogherinin

Delegacioni shtetëror për bisedime me Serbinë, i kryesuar nga Fatmir Limaj dhe Shpend Ahmeti, pas takimit që kanë pasur me shefen e politikës së jashtme të Bashkimit Evropian, Federica Mogherini, kanë thënë se ata ia kanë prezantuar asaj delegacionin si dhe rezolutën rreth çështjes së dialogut. “Sipas Mogherinit, BE-ja përkrah secilën marrëveshje që përfaqëson vlerat e Bashkimit Evropian”, ka thënë Ahmeti. Kryetari i PSD-së tha se kanë folur edhe për taksën dhe kanë shprehur qëndrimin e Kosovës se nuk hiqet taksa. Limaj e Ahmeti kanë thënë se taksa ndaj mallrave serbe do të hiqet nëse arrihet marrëveshja gjithëpërfshirëse, përcjell albinfo.ch

Ahmeti dhe Limaj kanë thënë nga Brukseli se ia kanë bërë të qartë Mogherinit që Kosova përfaqësohet me ekip dhe jo me individ.

“E bëmë të qartë. Jemi këtu me mandat kushtetues dhe të Parlamentit. Gjithashtu, ne do të diskutojmë dhe tëdebatojmë që të arrijmë te dialogu. Dialogu do të vazhdojë në nivel të shteteve. Kosova ka ekip negociator. Tash dialogu ka një adresë. Çdo ftesë, përfshirë presidentin, ia bëmë të qartë që t’i dërgohet delegacionit shtetëror. Kur ka takime të presidentëve, ka. Kur ka të ekipeve, ka të ekipeve. Ne kemi përgjegjësinë për të negociuar marrëveshjen, në konsultim me krerët e tjerë shtetërorë”, kanë thënë më tej krerët e ekipit negociator.