Kujdestari të përjetshme për dhunuesin e shumëfishtë

Ka abuzuar seksualisht tri femra në kohën kur po e shfrytëzonte lejen e pushimit nga masa e kujdestarisë që i ishte shqiptuar në vitin 1999 për përdhunim

Gjykata Penale e kantonit Basel-Stadt e ka dënuar me kujdestari të përjetshme një kryes të shumëfishtë të krimeve seksuale, përdhunimeve.

Krahas kësaj mase, atij i është shqiptuar edhe dënimi me burg katër vjet e gjysmë.

Ai (Markus W.) është akuzuar se ka abuzuar seksualisht së fundi tri femra pasi i ka narkotizuar duke u  dhënë barëra të forta gjumi, me çka ato kanë qenë të paafta të mbroheshin.

Këtë akt e ka bërë në një banesë në Bazel, në kohën kur po e shfrytëzonte lejen e pushimit nga masa e kujdestarisë që i ishte shqiptuar qysh në vitin 1999, po ashtu për përdhunim.

Sipas ekspertizës së bërë nga dy ekspertë, te zvicerani 56 vjeçar nuk ndikojnë terapitë dhe kjo gjendje pritet të vazhdojë edhe një kohë të gjatë. Për këtë arsye ata mendojnë se te ai ekziston rreziku i përsëritjes së veprave të kësaj natyre.