Mbahet referendumi për çmimin e vinjetës

Janë mbledhur 107.474 nënshkrime për iniciativën, me çka është tejkaluar kushti i kërkuar prej 50 mijë nënshkrimesh.

Zviceranët me të drejtë vote përfundimisht do të kenë rastin të votojnë në referendum për ose kundër ngritjes së çmimit të vinjetave për autostradë. Aktualisht çmimi i një vinjete është 40 franga ndërsa sipas propozimit qeveritar ajo duhet të kushtojë 100 franga, shkruan nzz.ch.

Komiteti që ka bërë gati iniciativën është i vendosur kundër ngritjes së çmimit në fjalë.

Siç ka njoftuar zyra federale përgjegjëse, janë mbledhur 107.474 nënshkrime për iniciativën, me çka është tejkaluar kushti i kërkuar prej 50 mijë nënshkrimesh.  

Sipas propozimit të qeverisë, ngritja e çmimit të vinjetave do të hynte në fuqi në fillim ë vitit 2015, ndërsa referendumi do të mbahet më 24 nëntor të vitit 2013.

Arsyetimi për këtë ngritje çmimi është mungesa e fondeve për mirëmbajtjen teknike të autostradave zvicerane.

Po këtë ditë do të hidhet në votim edhe iniciativa për proporcionin 1:12 në mes të pagave më të vogla e atyre më të mëdha si dhe iniciativa e SVP-së për familjen.