Dogana e aeroportit konfiskon 5000 orë të falsifikuara

Malli vinte nga Greqia dhe ishte destinuar për në Spanjë dhe Portugali. Bëhet fjalë për prodhime të kualitetit të dobët

Në pikën doganore të Aeroportit të Cyrihut brenda pesë ditëve në fund të gushtit dhe në fillim të shtatorit janë kapur rreth 9000 prodhime të ndryshme të falsifikuara. Prej tyre vetëm orë dore kanë qenë rreth 5 mijë. Artikujt tjerë të falsifikuar që janë gjetur janë çanta, rripa, portofole dhe gjësende tjera.

Siç thotë një zëdhënës i doganës së aeroportit, zyrtarët doganorë gjatë një kontrollimi rutinor kanë gjetur këto orë falsifikat në një arkë e madhe. Kur kanë konstatuar se arka të tjera nga i njëjti dërgues ishin gjetur edhe në postë, zyrtarët kanë dyshuar dhe kanë gjetur edhe atje mallin e njëjtë.

Pesha e përgjithshme e mallit të sekuestruar me këtë rast nga dogana është rreth 1.3 tonë, shkruan 20minuten.ch. Ai vjen nga Greqia dhe ishte destinuar për në Spanjë dhe Portugali. Bëhet fjalë për prodhime të kualitetit të dobët, ka thënë zëdhënësi.

Është e mundur që ky mall duhej të shitej në plazhet e vendeve përkatëse, ka thënë ai.