Ekspertët zviceranë: Arafati ka vdekur nga helmimi

Në mostrat që kanë marrë nga mbetjet mortore të Arafatit, ata kanë konstatuar prani deri në 20 fish më të madhe se normalja, të elementit Polonium 210

Ekspertët zviceranë të forensikës të cilët kanë bërë hetimet në lidhje me vdekjen e Jassir Arafatit kanë ardhur në konstatimin se më i besueshëm është varianti sipas të cilit ish shefi i PLO-së, kishte vdekur si pasojë e helmimit. Siç kanë theksuar ekspertët në fjalë në një konferencë për medie të mbajtur në Lozanë, ata e mbështesin në mënyrë “të matur” këtë tezë.

Ekspertët, në mostrat që kanë marrë nga pjesë të ndryshme të mbetjeve mortore të Arafatit, kanë konstatuar prani deri në 20 fish më të madhe se normalja, të elementit Polonium 210. Kështu ka deklaruar François Bochud, udhëheqës i Institutit për radiomedicinë të Spitalit Universitar të Lozanës, shkruan nzz.ch.

Dy studiuesit kanë theksuar se koha e gjatë e kaluar nga vdekja e Arafatit (viti 2004) e ka vështirësuar dëshmimin e shkaqeve të vdekjes, duke zbehur provat.

Megjithatë ekspertët janë treguar të befasuar me koncentrimin e lartë të poloniumt 210 në mostrat e ekzaminuara.