Më të shtrenjtat, kinematë e Zvicrës

Nëse ju dëshironi të shikoni filmin e fundit në kinema duhet t’i shikoni thellë e më thellë xhepat tuaj

Kështu thotë një studim i portalit  «Ab in den Urlaub», i cili ka nxjerrë në dritë çmimet e biletave duke vizituar 448 kinema në 115 qytete në Gjermani, Austri dhe Zvicër. Fokusi ishte në çmimet e të shtunës, kur kinematë janë shumë të frekuentuara.

Në Gjermani kënaqësia për të shikuar një film në kinema kushton mesatarisht rreth 15 euro për dy persona. Në Austri biletat e kinemave sillen deri në 18 euro. Por, me të vërtetë, edhe një herë është më shtrenjtë në Zvicër. Me rreth 29 € një çift ose dy shokë mund të shikojnë një film në kinematë e Zvicrës, pothuajse dy herë më shtrenjtë se në Gjermani.

Por nuk është gjithmonë shtrenjtë. Ditëve të veçanta në kinema figurojnë bileta me zbritje mesatarisht deri në 22 për qind.

Gjithashtu edhe në qytetet zvicerane ka ndryshime në çmimet e kinemave. Një natë filmi më e lirë është në Gjenevë me rreth 27 €. Në Bernë kushton rreth 28 €, në Bazel 29 dhe në Cyrih është më i shtrenjti, 30 €, kanë gjetur autorët e studimit.