Kërkohet të mos dëbohen refugjatët në Ballkan gjatë dimrit

Landi Schleswig-Holstein heq dorë nga dëbimi i refugjatëve në Serbi, Maqedoni, Kosovë, Mal të Zi, Bosnjë dhe Shqipëri deri në fund të marsit të vitit 2014

Landet gjermane në këtë fillim dimri janë të preokupuara në mënyrë më të veçantë me politikën e tyre të azilit. Sërish është aktualizuar dilema se a duhet të lejojnë që azilkërkuesit të cilët nuk e kanë fituar azilin të “dimërojnë” për shkaqe humanitare në Gjermani apo të dëbohen në vendet prej nga kanë ardhur. Në këtë kontekst bëhet fjalë kryesisht për azilkërkuesit nga vendet ballkanike.

Pikërisht për këtë dilemë është duke debatuar aktualisht senati i Hamburgut. Të Gjelbrit në këtë senat, duke u nisur nga shembulli i landit Schleswig Holstein, po kërkojnë që edhe Hamburgu të heqë dorë nga dëbimi i refugjatëve ballkanikë, shkruan berlinerzeitung.de.

Kieli, të premten e kaluar ka vendosur sërish për një “moratorium dimëror”. Në këtë bazë, ai heq dorë nga dëbimi i refugjatëve në Serbi, Maqedoni, Kosovë, Mal të Zi, Bosnjë e Hercegovinë dhe Shqipëri deri në fund të marsit të vitit 2014.

Nga ana tjetër, qeveria në landin Niedersachsen “nuk sheh nevojë” për të vepruar ngjashëm. Sipas një zëdhënëseje të kësaj qeverie, edhe tash “janë duke u shqyrtuar rastet e veçanta sipas kritereve humanitare”. Gjendja e rëndë sociale në Ballkan do të kihet parasysh por tekstualisht nuk do të kërkohet nga autoritetet që të heqin dorë nga dëbimi i refugjatëve në vendet ballkanike.