Parlamenti, kundër iniciativës për pagën minimale

Iniciativa kërkon që të përcaktohet shuma nën të cilën ligji nuk lejon pagë më të vogël. Kjo shumë, duhej të ishte 22 franga në orë ose rreth 4000 franga në muaj

Dhoma Nacionale e Parlamentit të Zvicrës ka votuar me shumicë votash kundër Iniciativës për Pagën Minimale, duke ndjekur kështu shembullin e dhomës tjetër, asaj të kantoneve, e cila një endim të tillë e kishte marrë më herët.

Epërsia e kundërshtarëve të iniciativës së përmendur ishte në raportin 128 me 59 që pasqyron afërsisht edhe raportin e forcave në parlament. Partitë e spektrit të djathtë, siç e dhe pritej, ishin unikë në kundërshtimin e pagës minimale, ndërkohë që partitë e majta, SP/PS he Partia e Gjelbër, ishin për futjen e saj.

Iniciativa, e cila është realizuar nga Federata e Sindikatave të Zvicrës (SGB) kërkon që në Zvicër të përcaktohet shuma nën të cilën ligji nuk lejon pagë më të vogël. E kjo shumë, sipas iniciuesve duhej të ishte 22 franga në orë ose rreth 4000 franga në muaj. Iniciativa vë në dukje se në Zvicër më shumë se 300 mijë persona, edhe pse punojnë me normë të plotë, fitojnë më pak se 4000 franga në muaj, shkruan azonline.ch.

Ministri i brendshëm Johan Schneider Ammann ka arsyetuar qëndrimin kundër iniciativës për pagën minimale. Me këtë rast ai ka thënë se sistemi i sotëm në të cilin partnerët socialë i negociojnë kushtet e punës dhe pagat është treguar si shumë i suksesshëm. Ai ka thënë se edhe qeveria e lufton varfërinë në vend, mirëpo, sipas tij, nuk janë të varfër ata që marrin paga të ulëta por ata që nuk janë fare të punësuar.