Femrat, të diskriminuara me paga që në start të punës

Realizuesit e studimit, për të ardhur në këtë përfundim kanë ndjekur lëvizjet në pagat e 6000 të rinjve nga viti 2000 e deri më tash

Se femrat në Zvicër janë të diskriminuara në krahasim me meshkujt sa i përket pagës që marrin, për punën e njëjtë, është një fakt që njihet pej kohësh. Por, ky dallim në paga i përcjell ato që nga hyrja në profesion dhe gjatë gjithë përvojës së punës dhe ky është një përfundim të cilin e ka nxjerrë një studim i ri i realizuar me porosi të Fondit Nacional të Zvicrës.

Paga mesatare fillestare që marrin femrat e reja që kanë nisur punën është për 278 franga ose për 7 për qind më e ulët se ajo që marrin moshatarët e tyre të gjinisë së kundërt dhe me kualifikim të njëjtë.

Realizuesit e studimit, për të ardhur në këtë përfundim kanë ndjekur lëvizjet në pagat e 6000 të rinjve nga viti 2000 e deri më tash. Sipas tyre, edhe rritja e pagave gjatë kësaj kohe te femrat ka qenë më e ulët se te meshkujt.

Shkaqet që kanë sjellë në këtë situatë, sipas studiuesve mund të qëndrojnë te përzgjedhja me ose pa vetëdije nga meshkujt e firmave ku pagat janë më të larta. Një faktor mund të jetë edhe negocimi më këmbëngulës i pagave që bëjnë meshkujt në krahasim me femrat, shkuan tagblattch.

Por një rol në pagat diskriminuese, sipas studimit në fjalë mund të luajë edhe orientimi tradicional i femrave në profesionet “tipike femërore” që paguhen më pak, si në lëmin e shëndetësisë, kozmetikës, floristikës etj.

Po ashtu si faktor diskriminues paraqitet perceptimi i punëdhënësve se femrat janë më shumë se meshkujt të prira që të braktisin punën ose ta përgjysmojnë orarin, për shkak të martesës, lindjes së fëmijës etj.