Të Gjelbrit e Tesinës pro Iniciativës Kundër Migracionit Masiv

Sipas tyre, nga shkaku i fluksit të punëtorëve nga Italia fqinje, punëtorët vendës nga Tesina i nënshtrohen dumpingut të pagave

Iniciativa popullore “Kundër Migracionit Masiv” e udhüehequr nga SVP/UDC ka marrë mbështetje nga një anë e papritur. Ka qenë pikërisht Partia e Gjelbër, dega në kantonin e Tesinës, ajo që është solidarizuar me këtë iniciativë. Kur njihet karakteri i majtë i të gjelbërve, konsiderohet jo tipike që një parti e tillë t`i dalë në krah SVP-së së djathtë.

Kështu, siç bën të ditur kjo parti, në kuvendin e saj ka miratuar mbështetjen për iniciativën që kërkon kufizimin e numrit të të huajve në Zvicër, duke devijuar nga linja e përgjithshme e partisë në qendër. Kjo e fundit vazhdon të mbajë qëndrimin kundër iniciativës së SVP/UDC-së dhe ka bërë rekomandimin që ajo të hidhet poshtë nga votuesit, shkruan nzz.ch.

Por arsyetimi i të gjelbërve tesinezë për të marrë këtë qëndrim ka qenë brengosja për tregun e punës në këtë kanton. Sipas mendimit të tyre, nga shkaku i fluksit të punëtorëve nga Italia fqinje, punëtorët vendës nga Tesina i nënshtrohen dumpingut të pagave.  

/albinfo.ch/