Burgu për dëbim, nga 18 muaj shkurtohet në 13 javë

Me rregulloren e miratuar sot, azilkërkuesit që duhet të dëbohen në një shtet tjetër të Dublinit nuk mund të mbahen më gjatë se 13 javë në burg

Koha e mbajtjes në burgun për dëbim të azilkërkuesve në të ardhmen do të shkurtohet në masë të madhe. Këshilli Federal ka miratuar sot një vendim lidhur me rregulloren e re Dublin-III.

BE-ja në nëntorin e vitit ë kaluar në kuadrin e rregullores Dublin-III ka vendosur rregulla të reja për të bërë më efikas sistemin e Dublinit. Një mjet në këtë drejtim ka qenë shkurtimi i kohës së mbajtjes së azilkërkuesve në burgun për dëbim.

Kështu, me rregulloren e miratuar sot nga Këshilli Federal i Zvicrës, azilkërkuesit që duhet të dëbohen në një shtet tjetër të përfshirë në Marrëveshjen e Dublinit nuk mund të mbahen më gjatë se 13 javë në burg. Prej tyre është paraparë që 7 javë të jenë për burgun përgatitor dhe gjashtë për burgun për dëbim. Ky i fundit mund të caktohet vetëm kur ekziston rreziku për hedhje në ilegalitet i azilkërkuesit.

Sipas rregullave ende në fuqi, burgu për dëbim mund të zgjasë maksimalisht deri në 18 muaj.  

Kritikat më të shumta gjatë fazës  së konsultimit  janë drejtuar te qëndrimi për kohëzgjatjen e vogël të burgut administrativ. Kjo gjë, sipas kantoneve bën që të shtohet numri i azilkërkuesve që hidhen në ilegalitet.

Marcel Suter, kryetar i bashkësisë së autoriteteve kantonale të migracionit ka thënë se afati vetëm 6 javësh i mbajtjes në burg për dëbim është tepër i shkurtër dhe mund ta bëjë hedhjen në ilegalitet një praktikë të rregullt.  

Nisur nga kritikat, Këshilli Federal i ka propozuar parlamentit që të fusë edhe masën plotësuese prej gjashtë javësh tjera në rast të mungesës së kooperativitetit të azilkërkuesve.

Shumica e rregullave të reja nuk kanë nevojë të futen në shkallë ligji. Për këtë arsye Këshilli Federal ka vendosur zbatimin parcial të rregullores Dublin-III, e cila ka hyrë në fuqi në fillim të vitit. (sda)