13 vjet burg për terapeutin, abuzues seksual

Edhe pse ai ka pranuar kryerjen e 114 delikteve, për shkak të vjetërimit të shumicës së delikteve, gjykata e ka shpallur atë fajtor vetëm për 33

Gjykata Regjionale e Bernës ka shpallur sot vendimin me të cilin një terapeut social 57 vjeçar është dënuar me 13 vjet heqje lirie dhe me mbikëqyrje stacionare.

I dënuari kishte pranuar se përgjatë një periudhe 29 vjeçare kishte kryer 114 abuzime seksuale të shkallëve të ndryshme ndaj personave me gjendje të rëndë mentale dhe të miturve në shtëpitë për strehimin e personave me të meta mentale.

Për shkak të vjetërimit të shumicës së delikteve, gjykata e ka shpallur atë fajtor vetëm për 33 syresh.

Ai është shpallur fajtor për veprat penale përdhosje, veprime seksuale me fëmijë, persona të varur nga përkujdesja etj.

Për kryetarin e trupit gjykues, si numri i delikteve ashtu dhe kohëzgjatja e kryerjes së tyre janë „ekstreme“. Sipas tij, fakti se viktimat kanë qenë persona me të meta të rënda, është një sqarim për atë se si ka pasur mundësi që një krim i tillë në vazhdime të mbetet kaq gjatë i pazbuluar.

Zbulimi i tij ishte bërë në vitin 2010, pasi që dy fëmijë me të meta mentale i kishin treguar prindërve të tyre për kontaktet seksuale të terapeutit me ta.