Qeveria ofron zgjidhje kalimtare për shkëmbimin e studentëve

Ajo ka marrë një vendim që do t`u mundësojë studentëve që të studiojnë jashtë vendit, me mbështetje të shtetit. Fondi për vitin 2014 është 22.7 milionë franga

Pas bllokimit që BE i bëri pjesëmarrjes së Zvicrës në programin për këmbimin e studentëve “Erasmus+”, si ndëshkim për votimin e “iniciativës kundër migrimit masiv”, Qeveria Zviecrane ka gjetur një zgjidhje kalimtare.

Ajo ka marrë sot një vendim që do t`u mundësojë studentëve zviceranë që edhe më tutje të studiojnë jashtë vendit, me mbështetje financiare të shtetit.

Këshilli Federal ka vendosur që kjo të mbulohet nga fondi i paraparë si kontribut i Zvicrës për pjesëmarrjen në programet e BE-së për këmbimin e studentëve.

Ky fond për vitin 2014 është 22.7 milionë franga, shkruan sda. Me këto para do të mbulohen edhe shpenzimet e parapara për studentët e huaj në Zvicër.

Qeveria ka theksuar me këtë rast se kjo zgjidhje kalimtare ka kufizimet e veta, por do të lehtësojë megjithatë qasjen e studentëve në programet e studimit jashtë vendit.

Shkasi direkt për të cilin BE e ka pezulluar pjesëmarrjen e Zvicrës në programin e shkëmbimit të studentëve ka qenë ndërprerja e njëanshme nga ana e Zvicrës e zgjerimit të marrëveshjes për lëvizje të lirë edhe me Kroacinë, si anëtarja më e re e BE-së.

Refuzimi i zgjerimit nga ana e Zvicrës është arsye për bllokimin edhe të marrëveshjeve tjera Zvicër – BE.

Të martën qe paralajmëruar mundësia e gjetjes së një zgjidhjeje kompromisi me BE-në sa i përket përfshirjes së Kroacisë por ende nuk ka ndonjë gjë konkrete rreth kësaj.