Së shpejti, një muaj “pushim lehonie“ për etërit?

Ky model është plotësisht i realizueshëm dhe do të kushtonte 384 milionë franga në vit, shkruan Travail Suisse

Krahas nënave edhe baballarët kanë pjesën e tyre të detyrimeve në rritjen dhe edukimin e fëmijëve. Por, lindja e fëmijës vazhdon të konsiderohet vetëm si çështje e nënës dhe jo e babait, kështu që ai e merr vetëm dy ditë pushim për lindjen e fëmijës. Kjo është tepër pak dhe nuk përkon me realitetin e tashëm në shoqëri, konsideron federata e sindikatave Travail Suisse.

Për këtë arsye, propozon ajo, që baballarëve t`u takojnë deri në 20 ditë pune të lira gjatë vitit të lindjes së fëmijës. Gjatë kësaj periudhe që ata do ta merrnin përnjëherë ose të ndarë, do t`u paguhej 80 për qind e pagës se rregullt. Financimi i gjithë kësaj do të bëhej njësoj sikur te pushimi i lehonisë, te nënat.

Ky model është plotësisht i realizueshëm dhe do të kushtonte 384 milionë franga në vit, shkruan Travail Suisse, duke iu referuar një raporti të bërë më parë nga Këshilli Federal.  

Ndërkohë, për Qeverinë Federale “pushimi i lehonisë” për baballarët aktualisht nuk përbën prioritet, shkruan srf.ch. Ajo deri nga mesi i këtij viti do ta shqyrtojë nëse nenat dhe baballarët pas lindjes së një fëmije do të fitojnë të drejtën e uljes së orarit të punës në masën deri në 20 për qind.