Shtetasit e BE-së të mbetur pa punë, pas 6 muajsh dëbohen nga Zvicra

Projektligji parasheh po ashtu që shtetasit e BE-së, të cilët vijnë në Zvicër për të kërkuar punë nuk kanë të drejtë të marrin ndihmë sociale

Shtetasit e vendeve të Bashkimit Evropian dhe me qëndrim në Zvicër, kur mbeten pa punë, në kushte të caktuara do të humbin të drejtën e qëndrimit në afat prej gjashtë muajsh e më shumë. Kjo varet nga statusi i qëndrimit të tyre në Zvicër. Këshlli Federal i Zvicrës propozon ndryshimin e Ligjit për të Huajt dhe për këtë qëllim e ka dërguar një projektligj në parlament për miratim.

Projektligji parasheh po ashtu që shtetasit e BE-së, të cilët vijnë në Zvicër për të kërkuar punë nuk kanë të drejtë të marrin ndihmë sociale. Rishikimi i ligjit ka kuptim vetëm sa kohë që është në fuqi Marrëveshja me BE-në për lëvizje të lirë, arsyeton Këshilli Federal.

Qeveria propozon një formë automatizmi të këmbimit të informatave lidhur me shfrytëzimin e ndihmave komplementare nga këta shtetas të huaj. Organi kompetent që ndan këto ndihma duhet të lajmërojë autoritetet për të huajt lidhur me pagesat që u bën këtyre shtetasve të huaj të papunë. Nga ana tjetër, autoritetet për të huaj detyrohen të informojnë organin që ndan ndihmat komplementare kur shtetasit e përmendur e hubn të drejtën e qëndrimit në Zvicër.

Këto ndryshime, Qeveria e Zvicrës i ka parashikuar edhe para se të mbahej referendumi i 9 shkurtit që kufizon të drejtat e qytetarëve të BE-së në Zvicër.