Ministri gjerman shkon në Kosovë për rekrutimin e personelit shëndetësor

Ministri federal i shëndetësisë, Jens Spahn udhëton të hënën për në Kosovë. Qëllimi i këtij udhëtimi është rekrutimi i personelit shëndetësor

Sigurimi i përkujdesjes cilësore për të moshuarit, në Gjermani ka disa vjet që është një ndër problemet akute që preokupon autoritetet e shëndetësisë të vendit. Shtimi i nevojës për këtë kuadër vjen si pasojë e mplakjes së popullatës, zhvillim ky që ndodh në shpërpjesëtim me numrin e të rinjve gjermanë që zgjedhin këtë profesion.

Për të gjetur një zgjidhje për këtë problem kaq akut, Gjermania ka provuar deri tash disa masa, kryesisht duke rekrutuar dhe shkolluar infermierë/e të këtij profili nga vendet e Evropës Lindore, shkruan albinfo.ch. E këtu janë përfshirë edhe ata nga Shqipëria dhe nga Kosova.

Se problemi është kaq i mprehtë dhe kërkon zgjidhje edhe nga nivelet më të larta të shtetit, tregon edhe lajmi në vijim: Ministri federal i Shëndetësisë, Jens Spahn, udhëton të hënën për në Kosovë, shkruan inforadio.de. Qëllimi i këtij udhëtimi është rekrutimi i personelit shëndetësor (të profilit infermier, kryesisht në fushë të përkujdesjes për të moshuar).

Lidhur me këtë temë, radioja në fjalë ka biseduar me Judith Heepe, drejtoreshë për Shërbimin e përkujdesjes në Cgarite Berlin, e cila edhe personalisht ka përvoja me rekrutimin e personelit të këtij profili, jashtë vendit, përcjell albinfo.ch. Ajo flet lidhur me shanset dhe sfidat që paraqet rekrutimi i personelit të jashtëm në shëndetësinë gjermane.

---