Alarm kundër racizmit në facebook

Gjendja në mediet online karakterizohet nga një urrejtje që mund të drejtohet kundër secilit. Kjo "në rastin më të keq mund të çojë te dhuna", thotë kryetarja e Komisionit kundër Racizmit, Martine Brunschwig Graf

Kurrë më shumë nuk ka pasur racizëm dhe antisemitizëm të shprehur publikisht se sa tash, në epokën e facebook-ut dhe të rrjeteve sociale. Kjo gjendje ka ngritur shkallën e shqetësimit të Komisionit kundër Racizmit.

Kryetarja e këtij komisioni, Martine Brunschwig Graf ka kërkuar madje edhe ndërhyrje të Bernës zyrtare për të ndaluar “tiradat e urrejtjes” në rrjete online. Apo, siç është shprehur ajo në një intervistë dhënë gazetës “SonntagsZeitung” “Kemi arritur në një pikë në të cilën autoritetet duhet të bëhen aktive. Federata duhet të kërkojë të bisedojë me facebook-un për të shtuar masat që kjo platformë sociale të reagojë më shpejtë kundër devijimeve raciste”, ka thënë Graf.

Ajo më tutje ka shtuar se duhet parandaluar që deklarimet e dënueshme që i shohim në facebook dhe në rrjetet tjera sociale të vazhdojnë të publikohen edhe pse përbëjnë shkelje të ligjit. Kjo, sipas saj, është temë qendrore në komisionin e përmendur dhe së bashku me organizata të tjera në nivel federal janë duke u kërkuar zgjidhje peërkatëse.

“Ne duhet të marrim masa që edhe paditë që bëhen të kenë një ndikim”.

Racizmi dhe antisemitizmi në internet janë dukuri të pranishme tash një kohë të gjatë. Por “sot kemi një gjendje të tillë mungese të tabuve dhe të turpit që kurrë deri më tash nuk e kishim përjetuar. Shumë njerëz nuk janë të vetëdishëm që, duke shkruar në facebook po shprehen publikisht. Ata shkruajnë gjëra të tilla që nuk do të guxonin kurrë t`i thoshin”, është shprehur Brunschwig Graf.

Sipas saj, gjendja në mediet online karakterizohet nga një urrejtje, e cila mund të drejtohet kundër secilit. Dhe kjo “në rastin më të keq mund të çojë te dhuna”, ka përfunduar kryetarja e Komisionit kundër Racizmit, Martine Brunschwig Graf.