Fundoset anija me të paktën 200 emigrantë në Mesdhe

Një anije me të paktën 200 emigrantët është përmbysur në Detin Mesdhe, në afërsi të bregdetit libian, thonë Zyrtarët e Rojës Bregdetare në Libi

Foto ilustrim

Raportohet që shumica e personave nga Afrika të jenë mbytur. Roja bregdetare tha sot se janë shpëtuar më pak se 20 vetë. Anija e vogël prej druri u mbyt të premten vonë, në lindje të Tripolit.

Sic raporton VOA, Libia është bërë një pikë e rëndësishme e nisjes për afrikanët që përpiqen të shkojnë në Evropë për të gjetur punë dhe për t’i shpëtuar gjendjes së vështirë në vendet e tyre.

Aksidentet në det, që zakonisht ndodhin me anije të mbingarkuara dhe të paqëndrueshme, shkaktojnë çdo vit vdekjen e qindra emigrantëve nga Afrika e Veriut.

Që nga viti 2011, me rrëzimin dhe vrasjen e diktatorit Muamer Gadafi, trafikantët e qenieve njerëzore kanë shfrytëzuar kaosin politik të Libisë dhe kufijtë e saj plot të çara.