Dështojnë negociatat për rritjen e pagave në ndërtimtari

Në kërkesat e saj për negocim me përfaqësuesit e ndërtimtarisë, sindikata Unia kishte paraqitur rritjen lineare të pagave për 150 franga në muaj për të gjithë të punësuarit

Pronarët e firmave zvicerane te ndërtimit kanë ndërprerë, së paku përkohësisht, negociatat me sindikatat Unia dhe Syna lidhur me kërkesën e këtyre të fundit për rritjen e pagave të punëtorëve në ndërtimtari.

Kjo ndërprerje është konfirmuar nga vetë Federata e Ndërtimtarëve të Zvicrës.

Kjo federatë akuzon sindikatën Unia se po këmbëngul për të verifikuar krye më vete nëse në ndërmarrjet e ndërtimtarisë ka dumping të pagave ose jo, bën të ditur televizioni publik i Zvicrës. Në këtë veprim ajo (Unia) sipas federatës përdor edhe të dhëna të besueshme të kompanive. Një gjë e tillë, sipas ndërtimtarëve është e drejtuar kundër partneritetit social që duhet të kenë në mes vete kompanitë me sindikatat.

Në kërkesat e saj  për negocim me përfaqësuesit e ndërtimtarisë, sindikata Unia kishte paraqitur rritjen lineare të pagave për 150 franga në muaj për të gjithë të punësuarit në ndërtimtari. Ajo e kishte mbështetur këtë kërkesë në gjendjen shumë të mirë që aktualisht po mbretëron në degën e ndërtimit në gjithë Zvicrën.