Të rinjtë zviceranë i bëjnë më “cool” ministrat e tyre

Në një fushatë, përmes fotoshopit ata u apelojnë politikanëve të lartë që ta bëjnë "më rinore" politikën e tyre

Parlamentet e të Rinjve i Zvicrës të të gjitha partive kanë marrë një fushatë interesante: Ato dëshirojnë të “përtërijnë” dhe t`i bëjnë më “cool” ministrat (këshilltarët federalë) të Zvicrës. Kështu, përmes një përpunimi me fotoshop, të rinjtë i kanë bërë më të rinj dhe më të modës, shtatë ministrat federalë. Të përkujtojmë se mosha mesatare e ekzekutivit të vendit është 55 vjeç dhe ky fakt është i mjaftueshëm për të ngjallur reaksionin përkatës te të rinjtë. 

Rezultati i “kurës përtëritëse” është mjaft interesant. Fjala vjen të rinjtë e kanë “veshur” Ueli Maurerin konservativ të SVP/UDC-së që është ministër i mbrojtjes  si një reper tipik, madje i kanë vënë edhe një varg zinxhirësh rreth qafe. Ministrja e financave Eveline Widmer-Schlumpf në “edicionin” e të rinjve duket si një e re me stil “punk” me percing dhe me make-up të fortë që bie shumë në sy. Ndërsa ministres së energjetikës Doris Leuthard, përveç një frizure dhe veshje rinore, ia kanë vënë një distinktiv të lëvizjes antinukleare… Ngjashëm, në kundërshtim të plotë me moshën dhe stilin që kanë realisht, janë trajtuar edhe ministrat tjerë.   

Gazeta e mbremjes “Blick am Abend” ia ka lënë në dispozicion faqen e parë dhe disa faqe të brendshme të numrit të djeshëm kësaj fushate.

Parlamentet rinore të Zvicrës kanë angazhuar një agjenci reklamash për të bërë “styling”-un e misntrave. Me sloganin “Bëje politiken zvicerane më rinore” që shpërthen në pllakatet me këto fotografi, organizatat rinore kërkojnë të angazhohen më shumë politikisht. Fushata është lancuar me rastin e Konferencë së 22-të të parlamenteve rinore që është mbajtur në fundjavën që shkoi.