Të punësuarit në Zvicër, gjithnjë e më të pakënaqur

Janë 78.1% të të punësuarve që brengosen për vendin e tyre të punës. Ndërsa është rritur edhe pakënaqësia me  pagat

Të punësuarit në Zvicër janë gjithnjë më të pakënaqur me kushtet e tyre të punës. Këtë konstatim e ka bërë Federata e sindikatave zvicerane Travail Suisse, në një komunkatë të saj të publikuar sot, shkruan srf.ch.

Sipas një sondazhi përfaqësues të bërë online në bashkëpunim me Shkollën e Lartë Profesionale të Bernës, rreth 42.3 % të punëtorëve janë shprehur se ndihen shpesh të stresuar për shkak të punës që bëjnë, transmeton albinfo.ch. Veç kësaj, gjthnjë më shumë punëtorë brengosen për vendin e tyre të punës.

Për pakënaqësinë e tyre, sipas sondazhit, “fajtore” janë  pagat që kanë stagnuar, ashtu si dhe problemet e përshtatjes së profesionit me jetën private.

Shkalla prej 42.3% e stresit, e regjistruar në këtë sondazh, është për 2.3% më e lartë se ajo e një viti më parë.

Vetëm 6.7% të të anketuarve nuk ndihen asnjëherë të stresuar nga puna, përcjell albinfo.ch. Duket e besueshme lidhja në mes të stresit të konstatuar dhe orëve shtesë të punës që po bëhen gjithnjë më të shpeshta për të punësuarit, kanë shkruar autorët e studimit.

Në asnjërin nga pesë studimet e realizuara deri tash mbi këtë temë nuk është vlerësuar kaq negativisht sikur këtë vit, dimensioni shëndetësor.

Janë 78.1% të të punësuarve që brengosen për vendin e tyre të punës. Ndërsa është rritur edhe pakënaqësia me  pagat. 12.4% konsiderojnë se rrogat e tyre nuk janë në përputhje me punën. Një vit më parë, këtë mendim e kishin 9.4% të të anketuarve.

---