Të dielën 50 psikologë kosovarë mbërrijnë në Shqipëri

50 psikologë, 4 psikiatër, 1 epidemiolog dhe mjek, po trajnohen intensivisht në Prishtinë për të udhëtuar drejt Shqipërisë

Duket se Kosova ka qenë në vijë të parë për sa i takon ndihmës në këto ditë të vështira për Shqipërinë.

Me burim njerëzore, ndihma në ushqime, veshje, para etj., ajo ka hapur edhe dyert e shtëpive për të prekurit nga tërmeti i 26 nëntorit, shkruan tch.

Po ashtu, pavarësisht ngrohjes së zemrave të shqiptarëve, nga gjithë ky solidaritet që nuk mungoi as nga drejtime të tjera, pasojat që tërmeti shkatërrimtar la pas nuk janë vetëm materiale, por edhe psikologjike.

Tronditja që shkaktoi tërmeti do kohë të kapërcehet. Ndaj, tani kur një kapitull u mbyll, ai i kërkimit nën rrënoja, vëmendja kthehet edhe nga gjendja psikologjike. 50 psikologë, 4 psikiatër, 1 epidemiolog dhe mjek, po trajnohen intensivisht në Prishtinë, për të udhëtuar drejt Shqipërisë. Ky ekip do të mbërrijë të dielën në Shqipëri, për t’i ardhur në ndihmë popullatës, veçanërisht në zonat më të prekura.

Sipas kërkesës së Ministrisë së Mbrojtjes së Shqipërisë dhe me urdhër të komandantit të Forcës së Sigurisë së Kosovës, FSK nisi edhe kontigjentin e parë me pajisje ushtarake fushore drejt Shqipërisë. Kjo për shkak se pas katastrofës në vend, një numër i madh familjesh kanë mbetur pa një strehë mbi kokë, përcjell albinfo.ch.

---