Sa ka pasur qarkullim Coop-i dhe sa Migros-i në 2019-ën

Migros-i vitin e kaluar ka rritur shitjet në 28.7 miliardë franga. Kjo është për 0.7 për qind më shumë

Njëra ndër dy kompanitë e mëdha të tregtisë me pakicë në Zvicër, Migros-i, vitin e kaluar ka rritur shitjet në 28.7 miliardë franga, shkruan srf.ch. Kjo është për 0.7 për qind më shumë, krahasuar me një vit më parë, transmeton albinfo.ch.

Siç raporton Migrosi, janë rritur në veçanti shitjet në internet (online), por gjithashtu ka shënuar rritje edhe biznesi me ushqime të gatshme ashtu si dhe Denner, që është një “degë”, e cila i është bashkuar Migrosit pak vite më parë. Në të kundërt, kanë regjistruar një rënie të vogël shitjet në dyqanet tradicionale.

Nga ana tjetër, rivali tradicional i Migrosit në këtë fushë, Coop, ka pasur në vitin 2019 një qarkullim prej 30.7 miliardë frangash, duke mbetur në të njëjtën shumë si në vitin 2018, përcjell albinfo.ch. Sipas informacionit që ka shpërndarë vetë COOP-i, grupi, pjesën më të madhe të qarkullimit të tij e ka bërë në tregun me pakicë.

Supermarketet kanë fituar klientë të rinj. Biznesi në internet (online) në sektorët e ndryshëm të Coop-it është rritur mbi mesataren, transmeton albinfo.ch. Ndërsa efektet e frangut të fortë në raport me euron në biznesin me shumicë thuhet se kanë bërë presion mbi shitjet.

---