Grenell mbetet 100% i përkushtuar për dialogun Kosovë-Serbi

FILE PHOTO: U.S. Ambassador to Germany Richard Grenell arrives for a ceremony in Berlin, Germany, November 9, 2018. REUTERS/Fabrizio Bensch/File Photo

I dërguari special i presidentit amerikan, Donald Trump, për dialogun Kosovë-Serbi, Richard Grenell, do të vazhdojë punën e tij në përpjekje të arritjes së një marrëveshje përfundimtare.

Grenell, i cili sapo është emëruar Drejtor në detyrë i Inteligjencës Kombëtare në SHBA, mbetet i përkushtuar në detyrat e tij.

Një gjë të tillë e ka konfirmuar për Klan Kosova zëdhënësi i tij, Dick Custin.

“Dua të theksoj se Ambasadori Grenell u dakordua me kërkesën e Presidentit Trump për të shërbyer si Drejtor në detyrë i Inteligjencës Kombëtare për një periudhë të kufizuar kohore dhe se Shtëpia e Bardhë do të njoftojë së shpejti kandidatin e saj. Nisur nga këto fakte, Ambasadori Grenell po mban postet e tij si Ambasador i SHBA-së në Gjermani dhe si i Dërguari Special i Presidentit në bisedimet e paqes midis Kosovës dhe Serbisë, për të cilat ai mbetet 100% i përkushtuar”.

Custin konfirmoi se Grenell do të mbajë të tre pozitat – Ambasador i SHBA-së në Gjermani, Drejtor në detyrë i Inteligjencës Kombëtare dhe si i Dërguar Special i Trump për dialogun Kosovë-Serbi.

Në cilësinë e kësaj të fundit Grenell deri më tani ka ndërmjetësuar arritjen e dy marrëveshjeve midis Kosovës dhe Serbisë – marrëveshja për hapjen e linjes ajorore Prishtinë-Beograd dhe atë për linjën hekurudhore dhe autostradën, përcjell Albinfo.ch.