Shqipëri: Miratohet kodi zgjedhor, ku përfshihen edhe votat e emigrantëve

Mbledhja e mbrëmshme e Këshillit Politik ka përfunduar me një marrëveshje mes përfaqësuesve. Pas më shumë se katër orëve mbledhjeje duket se palët kanë gjetur gjuhën e përbashkët për disa pika që janë debatuar shumë kohët e fundit, pra, sipas tyre, tashmë u arrit një kod zgjedhor që i përfshin të gjitha kërkesat, përcjell albinfo.ch.

Hajdari tha se në mbledhje u miratua vota e emigrantëve shqiptarë.

“Vota e diasporës është marrë si një çështje serioze. Opozita jashtëparlamentare nuk pranoi ndryshim sistemi. Do të përpiqemi të kemi një reformë zgjedhore të suksesshme. Në tryezë u shpreh vullneti i qartë politik që diaspora të votojë. Një peshë u bie dhe emigrantëve që duhet të regjistrohen për të votuar. Kjo është një kërkesë shumë e vonuar, sepse duhet të ishte bërë me kohë”, tha ai.

Nga ana tjetër, Damian Gjiknuri tha se puna e Këshillit Politik ka përfunduar në lidhje me Kodin zgjedhor dhe se në të janë reflektuar të gjitha kërkesat dhe frika që opozita kishte për votën. Gjiknuri tha se ky ligj siguron të jetë i gjithëpranuar, ndërsa shtoi se mund ta quajmë edhe ligj të shkruar nga vetë PD, shkruan Topchanel.

“U plotësuan kërkesat që ka pasur opozita. Një pjesë e ligjit të ri zgjedhor do të çohet në Kuvend. Deri të hënën duhet t’i çojmë Kuvendit draftin përfundimtar për të vijuar më tej. Depolitizimi i administratës zgjedhore do të implementohet në zgjedhjet e tjera. Për Kodin zgjedhor puna e Këshillit Politik është e mbyllur. Vota e emigrantëve tashmë është një e drejtë e garantuar. Emigrantët duhet të  regjistrohen në regjistër si votues. PD realizoi në këtë ligj pjesën më të madhe të kërkesave që kishin”, u shpreh ai.

Gjithashtu, edhe Oerd Bylykbashi dhe Petrit Vasili thanë se u pranua propozimi i tretë i opozitës së bashkuar për KQZ dhe u arrit të krijohej një kod që siguron votën e shqiptarëve dhe se nuk do të ketë tjetërsim të saj.