Rusisë i pengon flamuri i Kosovës në mbledhjen e Këshillit të Sigurimit

Ministrja e Punëve të Jashtme e Kosovës, Meliza Haradinaj-Stublla, e ka nisur fjalën e saj në mbledhjen e Këshillit të Sigurimit të OKB-së, duke thënë se Kosova është shtet i pavarur dhe sovran.

“Kjo është vërtetuar edhe me vendimin e Gjykatës Ndërkombëtare të Drejtësisë”, është shprehur ajo me ta marrë fjalën, pas homologut të saj serb, Ivica Daçiq.

Derisa kryedeplomatja kosovare po merrte fjalën, presidenca ruse, insistoi që të largohet flamuri i Kosovës mirëpo ajo nuk e lejoi këtë gjë.

“Ne kemi jemi në bazë të parimit të barazisë dhe simbolet e shtetësisë nuk pranojmë t’i largojmë. Nëse presidenca ruse na pamundëson me marrë pjesë në debat, po krijon një presedan të rrezikshëm”, tha ministrja Haradinaj.

Ndërkohë në fjalën e saj, kryediplomatja e Kosovës ka përmendur krimet e kryera nga Serbia në luftën e fundit në Kosovë.

“Serbia është duke e mohuar të kaluarën, sikurse masakrën e Reçakut, ku Aleksandër Vuçiq tha muaj më parë se nuk ka ndodhur dhe është fabrikim”.

“Trupat e personave të zhdukur duhet të kthehen menjëherë”.

“Serbia vazhdon të ketë ndikim te grupe kriminale që operojnë në veri të Kosovës. Serbia refuzon bashkëpuinimin për luftimin e krimit të organizuar dhe luftimin e llojeve të tjera të krimit. Serbia bën propagandë për destabilizim”.