Franca paralajmëron qytetarët që të shmangin Portugalinë dhe Spanjën këtë verë

Keystone EPA/KAI FOERSTERLING

Në një njoftim zyrtar, Franca po u kërkon qytetarëve të saj të shmangin udhëtimet në Portugali dhe Spanjë, pas rritjes së rasteve të reja me variantin Delta të COVID-19, përcjell albinfo.ch.

Po ashtu, qeveria thotë se nuk ka përjashtuar vendosjen e kufizimeve të udhëtimit në të dy vendet, shkruan Euronews.

“Për ata që nuk kanë rezervuar ende pushimet e tyre, shmangni Spanjën dhe Portugalinë në planet tuaja”, tha Clément Beaune, Sekretari Francez i Shtetit për Çështjet Evropiane.

“Kjo është një këshillë dhe një rekomandim për të cilin unë insistoj. Është më mirë të qëndrosh në Francë ose të shkosh në vende të tjera. Por, këtu kemi një situatë shqetësuese, veçanërisht në Portugali, e cila për fat të mirë po merr masa”.

Njoftimi francez është në kontrast me vendimin e fundit të Gjermanisë për të lehtësuar kufizimet mbi njerëzit që vijnë nga Portugalia. Qasjet e ndryshme nxjerrin në pah mospërputhjet e vazhdueshme në udhëtimet midis vendeve anëtare në BE, pavarësisht nga lëshimi i certifikatës së udhëtimit COVID në BE.