IKSHP: Ia ndalëm turrin virusit Delta

Instituti Kombëtar i Shëndetit Publik në Kosovë, përmes një postimi publik ka konstatuar se ia kanë ndalur turrin variantit Delta, pavarësisht numrit rekord të rasteve që po shënon vendi çdo ditë.

“Delta variantit ia kemi ndalur turrin, edhe pse akoma po raportohen shumë raste pozitive dhe shumë vdekje, duke shprehur ngushëllime për të gjithë familjarët! Virusi bartet shumë shpejt prej një personi në dhjetëra persona të tjerë me pasoja që në të shumtën e rasteve mund të jenë fatale, e që fatkeqësisht preken edhe fëmijët”, thuhet në njoftimin e këtij insituti.

IKSHP ka bërë thirrje sërish që të respektohen masat, në mënyrë që të ulet numri i rasteve dhe viktimave.

“Andaj ju lutemi të zbatoni masat e rekomanduara nga IKSHPK nga çdo qytetar i Republikës. Vetëm së bashku do ta rrafshojmë lakoren epidemike dhe do ta ndalim tërbimin e virusit SARS CoV-2. Bashkë me masat tashmë të njohura: bartja e maskave, mbajtja e distancës dhe mbajtja e higjienës, do të arrijnë efektin e vet në uljen e lakores, ju lutemi të besoni se masa më efikase në luftë kundër COVID-19 është VAKSINIMI”, thuhet në njoftim.