“Fytyra me shqiponjë”, tifozi nga Struga që jeton në Zvicër bëhet me pasaportë shqiptare

Foto FB: Besmir Limani - Fytyra me Shqiponjë

I njohur si “fytyra me shqiponjë”, tifozi Besmir Limani, nga fshati Tatesh i Strugës, i cili jeton në Zvicër, është pajisur me pasaportë të Shqipërisë.

Lajmin e ka bërë të ditur vetë ai, përmes një postimi në rrjetin social “Facebook”, ku ka falënderuar edhe Ministrin e Brendshëm të Republikës së Shqipërisë, Taulant Balla, shkruan albinfo.ch.

Nëpër afro 40 ndeshje të Kombëtares së Shqipërisë, që i ka ndjekur nëpër stadiume të ndryshme të Evropës, ai ka pasur fytyrën e pikturuar me ngjyrën e kuqe të flamurit dhe shqiponjën e zezë.

“I nderuari Ministër. Të faleminderit publikisht për realizimin e ëndrrës për pajisjen me pasaportë shqiptare. Në Gjermani Euro 2024, unë Besmir Limani ‘Fytyra me shqiponj’ udhëtoj edhe me dokument Kuq e Zi! I Juaji B.Limani”, ka shkruar ai.