Ryanair starton linjat nga Shqipëria, bileta duke nisur nga 15 euro

Operatori i fluturimeve të lira, Ryanair, nga 31 tetori nis së fluturuari nga Shqipëria.

Ai pritet të sjellë revolucionin e çmimeve të ulëta në Evropë. Në këtë drejtim, Michael O’Leary, CEO i Ryanair, vizitoi Tiranën me ekipin e tij të shitjes dhe ekipin operacional për të promovuar fillimin e fluturimeve të Ryanair për në/nga Tirana, duke filluar nga e marta (31 tetor).

Ryanair ka nisur një fushatë promocionale 3-ditore në të 17 destinacionet e reja për/nga Tirana, me 50,000 vende që janë në shitje, duke filluar nga 14.99 euro, të cilat janë në dispozicion nga nëntori 2023 deri në mars 2024 (edhe pse këto vende duhet të rezervohen deri më 28 tetor direkt në faqen e internetit të Ryanair)

O’Leary tha se oferta e lartë për sezonin dimëror të Ryanair në Tiranë me 17 destinacione, dhe mbi 200 frekuenca javore tregon kërkesën e jashtëzakonshme që ekziston për udhëtime me çmime vërtet të ulëta për ardhjen e turistëve në Shqipëri, si dhe për qytetarët shqiptarë gjithashtu.

Si linja ajrore nr. 1 në Evropè, Ryanair beson se mund të japë rritje të jashtëzakonshme dhe të qëndrueshme të trafikut dhe turizmit, jo vetëm këtë dimër, por edhe për shumë vjet të ardhshme në Shqipëri, përcjell albinfo.ch.