Kurti, në takim lamtumirës me ambasadorin bullgar: Jam i sigurt se do t’i mungojë Kosova

Kryeministri i Kosovës, Albin Kurti, e ka pritur në takim lamtumirës ambasadorin e Bullgarisë në Kosovë, Hristo Gudjev, përcjell albinfo.ch.

Zyra e Kryeministrit njoftoi të mërkurën se Kurti ka deklaruar se gjatë misionit të Gudjevit dy vendet i kanë thelluar dhe avancuar marrëdhëniet.

“Ambasadori Gudjev po përfundon misionin e tij diplomatik, por miqtë që ai ka bërë këtu do të zgjasin përjetë. Do të na mungojë dhe jam i sigurt se do t’i mungojë edhe Kosova. Prandaj, shpresoj të jetë mysafir i rregullt në vendin tonë, të cilin mund ta konsiderojë si shtëpinë e tij të dytë. Me këtë rast, më duhet të falënderoj jo vetëm Shkëlqesinë e Tij për gjithçka që ka bërë, por nëpërmjet tij, vendin që ai përfaqësoi në mënyrë të admirueshme në Kosovë”, ka deklaruar Kurti.

Kurti ka shtuar se Bullgaria ka qenë avokuese për Kosovën sa herë i është kërkuar, duke shtuar se partneriteti do të vazhdojë edhe tutje.