Kurti ftohet si dëshmitar nga Prokuroria Speciale

Zyra e kryeministrit

Kryeministri i Kosovës, Albin Kurti është ftuar të paraqitet si dëshmitar pranë Prokurorisë Speciale të Kosovës.

Këtë e ka bërë të ditur zëdhënësi i Qeverisë Përparim Kryeziu.

“Teksa kryeministri Kurti ndodhet në mbledhje të Kryesisë së Lëvizjes VETËVENDOSJE! për të përmbyllur listën e kandidatëve për deputetë nga koalicioni LVV, Guxo dhe Alternativa në zgjedhjet e vitit 2025, nga kryeministria më njoftuan se ka ardhur një ftesë për të nga Prokuroria Speciale”, ka shkruar Kryeziu.

Tutje ai shton se përmes kësaj ftesë po tentohet të ndikohet në zgjedhje.

“Në zgjedhjet e kaluara kishte një vendim gjyqësor i cili ia kishte pamundësuar kandidimin në garën zgjedhore të 14 shkurtit 2021, kurse tash përmes kësaj ftese po tentohet ndikimi në rezultatin e zgjedhjeve të 2025. Qëllimi mbetet i njëjtë. Metoda ka ndryshuar. Kjo është ndërhyrje e sistemit të drejtësisë në proces zgjedhor”, ka thënë Kryeziu.

Në ftesë thuhet se shefi i ekzekutivit duhet të paraqitet më 16 dhjetor në orën 09:30 të dëshmojë pranë Prokurorisë Speciale.