Haxhiu: Duhet të ketë mekanizëm për mbikëqyrjen e Gjykatës Speciale

Ministrja e Drejtësisë, Albulena Haxhiu, ka thënë se është i paprecedent faktin që Gjykata Speciale nuk i jep llogari asnjë institucioni në Kosovë.

Ajo ka theksuar Kosova patjetër duhet ta krijojë një mekanizëm mbikëqyrës ndërkombëtar apo vendor për Dhomat e Specializuara të Kosovës në Hagë, siç ka thënë ajo, veçanërisht në aspektin e të drejtave të personave të akuzuar.

Në një intervistë për KosovaPress, ajo ka deklaruar se të gjitha që kanë ndodhur në Hagë i kanë adresuar në kuadër të takimeve me krerët e këtij institucioni të drejtësisë.

Ajo ka theksuar se përveç kësaj nuk kanë asnjë kompetencë tjetër.

“Kemi diskutuar brenda nesh si institucione në raport me kërkesat që të ketë një organizëm, një mekanizëm që mbikëqyrë punën e Gjykatës Speciale. Nuk është që ka pasur pajtime se kush do të jetë mekanizmi, si do të krijohet mekanizmi, a do të jetë ndërkombëtar apo vendor. Kjo është në kuadër të kompetencave të Kuvendit të Republikës së Kosovës … Edhe përkundër faktit që kemi diskutuar, jemi takuar shumë shpesh, ka mendime të ndryshme, prandaj derisa nuk kemi një mendim të përbashkuar ose unifikues mendoj se duhet ta diskutojmë sërish. Është e rëndësishme që të ketë një mekanizëm që mbikëqyrë të paktën të drejtat e personave që po akuzohen, anshmërinë e gjykatës dhe rrethanat e tjera dhe rrethanat tjera që lidhen me punën e gjykatës. Mendoj se institucionet, të cilat nuk kanë mbikëqyrje nga askush, mendoj se është shumë problem…Është e paprecedent mënyra se si është themeluar, është e paprecedent mënyra se si nuk i jep llogari askujt. Prandaj, natyrisht që duhet Kuvendi i Republikës së Kosovës ta gjejë, megjithatë mund të mos jetë propozimi më i mirë i mundshëm, por të paktën ta kem një mekanizëm që e ka përsipër këtë“, ka deklaruar Haxhiu.