Votimi në diasporë, ambasada e Kosovës në Gjermani tregon procedurën e plotësimit dhe dërgimit të fletëvotimit

Ambasada e Kosovës në Gjermani ka publikuar një njoftim të rëndësishëm për të gjithë shtetasit e Kosovës, të cilët janë regjistruar për të votuar me postë për zgjedhjet parlamentare.
Në bazë të këtij njoftimi, të gjithë ata që janë të regjistruar për votim jashtë Kosovës, duhet të dërgojnë fletëvotimet në kutitë postare të KQZ-së në Kosovë, ose jashtë saj, duke ndjekur disa hapa

Hapi 1: Plotësimi i fletëvotimit

Shkarkoni dhe printoni fletëvotimin nga lidhja e dhënë.

Në anën e majtë të fletëvotimit do të gjeni listën e subjekteve politike. Zgjidhni një subjekt politik dhe në anën e djathtë mund të votoni deri në dhjetë kandidatë.

Pas plotësimit, paloseni fletëvotimin dhe vendoseni brenda një zarf dhe mbylleni.

Hapi 2: Dërgimi i fletëvotimit

Printoni dëftesën e regjistrimit që keni marrë përmes email-it gjatë regjistrimit.

Vendosni fletëvotimin e mbyllur dhe dëftesën e regjistrimit brenda një zarfi të dytë.

Mbi zarfin e dytë, shkruani adresën e kutisë postare të KQZ-së dhe vendosni një pullë postare.

Dërgojeni zarfin në postën më të afërt të shtetit ku jetoni.

“Kujdes! Fletëvotimi duhet të jetë individual dhe nuk mund të përfshini fletëvotime për anëtarët e familjes.

Zarfi duhet të ketë pullën postare dhe të dërgohet nga shteti ku jeni regjistruar. Për ndihmë dhe informacione shtesë, mund të kontaktoni linjën ndihmëse të KQZ-së përmes WhatsApp dhe Viber në numrin: +383 46 61 00 61”, thuhet në njoftim.

Kujtojmë se nga sot e deri më 8 shkurt, mbi 100 mijë shtetas të Kosovës që jetojnë jashtë vendit do të mund të votojnë me postë për zgjedhjet parlamentare të Kosovës më 9 shkurt.

Të gjithë shtetasit e Kosovës që janë regjistruar për të votuar sipas kësaj mënyre, adresat e kutive postare të KQZ-së jashtë Kosovës, por edhe të kutisë postare të KQZ-së në Kosovë, mund t’i gjejnë në faqen e KQZ-së. 

---