Kosovë: Partitë politike sot kanë nisur zyrtarisht fushatën zgjedhore

Foto: KQZ

Në Kosovë sot ka nisur zyrtarisht fushata zgjedhore e partive politike për zgjedhjet parlamentare që do të mbahen më 9 shkurt 2025.

Koalicioni AAK – Nisma – Konservatorët – Forumi Intelektual E-30 dhe Lista Ideal, është i pari që ka nisur sot fushatën, me nderime në memorialin e familjes Jashari në Prekaz.

Nga ora 16:30, Partia Demokratike e Kosovës ka hapur zyrtarisht fushatën për zgjedhjet e përgjithshme të 9 shkurtit në sallën “1 Tetori”, Prishtinë.

Ndërsa nga ora 17:00, Lidhja Demokratike e Kosovës (LDK) ka bërë hapjen e fushatës zgjedhore në Pallatin e Rinisë, Prishtinë.

Lëvizja Vetëvendosje hapjen e fushatës e bën në Gjakovë, në sallën e sporteve “Shani Nushi” në ora 18:00.

Ndërkaq, në ora 18:30 Koalicioni për Familjen hap zyrtarisht fushatën për zgjedhjet e përgjithshme.

Sipas të dhënave të KQZ-së, numri i qytetarëve me të drejtë vote në vendvotime, në Republikën e Kosovës, është: 1 milion e 970 mijë e 944 votues, ndërkaq, numri i qytetarëve që janë regjistruar për të votuar jashtë Kosovës, është 104 mijë e 924, transmeton albinfo.ch.