Arrestohen dy persona në Pejë, ua merrnin pensionin disa të moshuarve

Policia e Kosovës ka njoftuar se në Pejë ka arrestuar një burrë dhe një grua, pasi dyshohet se kanë keqpërdorur kartelat bankare të disa personave dhe ua kanë tërhequr paratë e pensioneve nga banka. 

“Policia e Kosovës, respektivisht Drejtoria për Hetimin e Krimeve Ekonomike dhe Korrupsionit (DHKEK), sot me 17.01.2025, ka zbatuar urdhër kontrollin e Gjykatës Themelore në Pejë, Departamenti për Krime të Renda, me ç’rast sipas urdhëresës janë kontrolluar tri (3) lokacione të ndryshme me dyshime për veprat penale ‘Keqpërdorim të detyrës zyrtare’, ‘Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit’, të parapara sipas KPRK-së”, thuhet në njoftim.

Nuk tregohet se çfarë pozitash zyrtare kanë personat e arrestuar.

Policia ka njoftuar se për këtë rast hetimet i ka nisur nga muaji korrik i vitit të kaluar me autorizim të Prokurorisë Themelore Pejë, me ç’rast thuhet se janë aplikuar masat e veçanta të hetimit si dhe ka bërë grumbullimin e informatave të nevojshme, duke bashkëpunuar edhe me institucione tjera sipas kompetencës, përmes të cilave është arritur të sigurohen dëshmi të arsyeshme për veprat panele të cekura më lart.